Jos 10 | NdeIBE | STEP | U-Adoni-Zedeki inkosi yaseJerusalema wezwa ukuthi uJoshuwa wayesethumbe i-Ayi wayitshabalalisa wenza e-Ayi enkosini yayo lokho ayekwenze eJerikho lenkosini yayo, lokuthi abantu baseGibheyoni babenze isivumelwano sokuthula labako-Israyeli njalo bahlale eduzane labo.

Joshua 10

Ilanga lima mpo

1 U-Adoni-Zedeki inkosi yaseJerusalema wezwa ukuthi uJoshuwa wayesethumbe i-Ayi wayitshabalalisa wenza e-Ayi enkosini yayo lokho ayekwenze eJerikho lenkosini yayo, lokuthi abantu baseGibheyoni babenze isivumelwano sokuthula labako-Israyeli njalo bahlale eduzane labo. 2 Yena labantu bakhe bethuswa kakhulu yilokhu, ngenxa yokuthi iGibheyoni kwakulidolobho eliqakatheke kakhulu, njengelinye lamadolobho esikhosini; lalilikhulu kule-Ayi, njalo amadoda alo wonke ayengabalwi ababelamandla. 3 Ngakho u-Adoni-Zedeki inkosi yase Jerusalema wakhalaza kuHohami inkosi yaseJamuthi, uJafiya inkosi yaseLakhishi loDebhira inkosi yase-Egiloni.

4 Wathi kubo, “Wozani lizongincedisa ukuhlasela iGibheyoni ngenxa yokuthi yenze isivumelwano sokuthula loJoshuwa labako-Israyeli.”

5 Ngakho amakhosi womahlanu ama-Amori – aseJerusalema, laseHebhroni, eJamuthi, eLakhishi lase-Egiloni – abambana. Aphuma lamabutho awo wonke ayihonqolozela iGibheyoni ayihlasela.

6 AmaGibheyoni athumela ilizwi kuJoshuwa ezihonqweni zaseGiligali athi: “Ungalahli izinceku zakho. Woza ngapha kithi ngokuphangisa uzosilamulela! Sincede, ngoba wonke amakhosi ama-Amori abusa emazweni asemaqaqeni asebambene ukuze alwisane lathi.”

7 Ngakho uJoshuwa wasuka eGiligali waqubuka kanye lebutho lakhe lonke, elaligoqela wonke amadoda ayekwazi ukulwa.

8 UJehova wathi kuJoshuwa, “Ungabesabi; sengibabeke esandleni sakho. Kakho loyedwa ozakwanelisa ukumelana lawe.”

9 Ngemva kokuhamba okobusuku bonke besuka eGiligali uJoshuwa wabajuma.

10 UJehova wenza ukuthi basanganiseke phambi kuka-Israyeli, wabehlula ngokunqoba okukhulu eGibheyoni. Abako-Israyeli baxotshana labo emgwaqweni oya eBethi Horoni baxhumana labo baze bayafika e-Azekha leMakheda.

11 Lapho babalekela abako-Israyeli emgwaqweni osuka eBethi Horoni usiya e-Azekha, uJehova wehlisa isiqhotho esikhulu sivela emkhathini, njalo inengi labo lafa libulawa yisiqhotho ukwedlula ababulawa zinkemba zabako-Israyeli.

12 Ngalelo langa uJehova wanikela ngalo ama-Amori kwabako-Israyeli, uJoshuwa wathi kuJehova phambi kwabako-Israyeli; “We langa, mana uthi mpo ngaphezu kweGibheyoni, We nyanga, lawe mana ngaphezu kweSigodi se-Ayijaloni.”

13 Ngakho ilanga lema lathi mpo, lenyanga yema, isizwe saze saphindisela ezitheni zaso, njengoba kulotshiwe eGwalweni lukaJasha. Ilanga lema phakathi laphakathi kwesibhakabhaka laphuza ukutshona okosuku lonke.

14 Kakukaze kube losuku olufana lalo ngaphambili kumbe kuze kube lamhlanje, usuku lapho uJehova alalela khona umuntu. Ngeqiniso uJehova wayelwela u-Israyeli!

15 Ngakho uJoshuwa waphindela labo bonke abako-Israyeli ezihonqweni zase Giligali.

Amakhosi amahlanu ama-Amori ayabulawa.

16 Amakhosi amahlanu lawo ayesebalekile ayacatsha ebhalwini lwase Makheda. 17 Kwathi uJoshuwa esetshelwe ukuthi amakhosi womahlanu ayetholakale ecatshile ebhalwini lweMakheda, 18 wathi, “Giqani amatshe amakhulu liwafake emlonyeni wobhalu, beselithumela amanye amadoda ukuthi alinde.

19 Kodwa lingemi! Xotshani izitha zenu, lingazivumeli ukuthi zifike emadolobheni azo, ngoba uJehova uNkulunkulu wenu esezethule ezandleni zenu.”

20 Ngakho uJoshuwa labako-Israyeli bababhubhisa baphosa baphela bonke kodwa abalutshwana abasalayo banelisa ukufika emadolobheni abo ayezinqaba. 21 Ibutho lonke lanelisa ukuphenduka ngokuthula kuJoshuwa esihonqweni seMakheda, njalo kakho owake wakhuluma okubi ngabako-Israyeli.

22 UJoshuwa wathi, “Vulani umlomo wobhalu beseliletha amakhosi womahlanu eze kimi.” 23 Ngakho bakhupha amakhosi womahlanu ebhalwini – amakhosi aseJerusalema, lase Hebhroni laseJamuthi, laseLakhishi kanye leyase-Egiloni. 24 Bathi sebelethe amakhosi la kuJoshuwa, wabiza wonke amadoda ako-Israyeli wasesithi kubo bonke abalawuli bamabutho ababeze laye, “Wozani lapha lizofaka izinyawo zenu ezintanyeni zala amakhosi.” Ngakho beza phambili basebefaka izinyawo zabo ezintanyeni zawo.

25 UJoshuwa wathi kubo, “Lingesabi; lingadangali qinani libe lezibindi. Lokhu yikho okuzakwenziwa nguJehova kuzo zonke izitha elizalwisana lazo.” 26 Ngakho uJoshuwa watshaya wawabulala amakhosi wawalengisa ezihlahleni ezinhlanu, ayekelwa elenga ezihlahleni kwaze kwahlwa.

27 Ekutshoneni kwelanga uJoshuwa walaya ukuthi bawethule ezihlahleni bawaphose ebhalwini lapho ayekade ecatshe khona. Emlonyeni wobhalu bafaka amatshe amakhulu alokhu ekhona lanamhlanje.

28 Ngalelo langa uJoshuwa wathumba iMakheda. Wahlasela idolobho kanye lenkosi yalo ngenkemba wabhubhisa wonke umuntu owayephakathi kwalo. Kakho owatshiywa ephila. Wenza enkosini yeMakheda lokho ayekwenze enkosini yaseJerikho.

Amadolobho aseningizimu ayanqotshwa

29 Ngakho uJoshuwa labo bonke abako-Israyeli ababelaye basuka eMakheda baya eLibhina balihlasela. 30 UJehova waphinda wanikela lelodolobho lenkosi yalo esandleni sika-Israyeli. Idolobho laye wonke umuntu owayephakathi kwalo uJoshuwa wakuhlasela ngenkemba. Kakho owatshiywa ephila lapho. Wenza enkosini yalo lokho ayekwenze enkosini yeJerikho.

31 Ngakho uJoshuwa labo bonke abako-Israyeli ayelabo bahamba besuka eLibhina besiya eLakhishi; balihonqolozela balihlasela.

32 UJehova wanikela iLakhishi ku-Israyeli, uJoshuwa wayithatha ngelanga lesibili. Idolobho laye wonke umuntu owayephakathi kwalo wakuhlasela ngenkemba, njengalokho ayekwenze eLibhina. 33 Kunjalonje uHoramu inkosi yaseGezeri yayize ukuzoncedisa iLakhishi kodwa uJoshuwa wayehlula ndawonye lebutho layo – kakho owatshiywa ephila.

34 Ngakho uJoshuwa labo bonke abako-Israyeli ababelaye basuka eLakhishi baya edolobheni le-Egiloni; balihonqolozela belihlasela. 35 Balithumba ngalelolanga balihlasela ngenkemba basebebhubhisa wonke umuntu owayephakathi kwalo, njengalokho ababekwenze eLakhishi.

36 Ngakho uJoshuwa labo bonke abako-Israyeli ababelaye bahamba besuka e-Egiloni besiya eHebhroni bayihlasela. 37 Balithumba lelidolobho balihlasela ngenkemba, ndawonye leNkosi yalo, imizana yalo laye wonke umuntu owaye phakathi kwalo, kakho owatshiywa ephila. Njengalokho abakwenza e-Egiloni, balitshabalalisa laye wonke umuntu owayephakathi kwalo.

38 Ngakho uJoshuwa labo bonke abako-Israyeli ayelabo baphenduka bahlasela iDebhiri.

39 Bathumba lelidolobho, inkosi lemizi yalo, bayihlasela ngenkemba. Bonke abantu ababephakathi kwalo babhujiswa baphela. Kakho owatshiywa ephila. Benza eDebhire lenkosini yakhona lokho abakwenza eLibhina lenkosini yakhona kanye leHebhroni.

40 Ngakho uJoshuwa wasinqoba sonke isabelo, okugoqela ilizwe elilamaqaqa, iNegebi, emawatheni ezintaba entshonalanga lemithezukweni yezintaba ndawonye lamakhosi alapho wonke. Kakho owatshiywa ephila. Wabhubhisa bonke abebephefumula, njengoba uJehova, uNkulunkulu ka-Israyeli wayebalayile.

41 UJoshuwa wabanqoba kusukela eKhadeshi Bhaneya kusiya eGaza lakuso sonke isabelo seGosheni kusiya eGibheyoni.

42 Wonke la amakhosi lamazwe awo athunjwa nguJoshuwa ekuhlaseleni kunye, ngenxa yokuthi uJehova uNkulunkulu ka-Israyeli walwela u-Israyeli.

43 Ngakho uJoshuwa waphindela laye wonke u-Israyeli ezihonqweni zase-Giligali.